تريد افضل مدرس عربي سادس علمي في العراق ؟
شوف راح انقل الك تجارب اكثر من طالب واكثر من مدرس
وانت اختار الافضل
واذا تريد افضل مدرس لمادة الفيزياء دوس هنا
ولمادة الاحياء دوس هنا
شوف ما دام دخلت لهاي المقالة لا تطلع لحد ما تخلصها نصيحة!!!!
افضل مدرس عربي سادس علمي
- حسين عبيده
- هشام المعموري
- خضر الضاهر
- احمد النعيمي
- رفل الزبيدي
- عقيل الزبيدي
- حمزة الجابري
 |
| اضغط هنا (عزيزي القارئ) |
تجربة اول طالب | افضل مدرس عربي سادس علمي في العراق
العربي أقسامه هواي وتعرفون القواعد والأدب والإنشاء، بس إذا رتبتوا وضعكم تضمنون الدرجة:
الإنشاء (حصة الأسد ٢٠/٢٠):
شوفوا عيني، الإنشاء هو أسهل شي بس يحتاج "تعبير من عدكم". لا تحفظون نماذج جاهزة لأن المصحح يعرفها. قسموا موضوعكم (مقدمة، عرض، خاتمة) واكتبوا بأسلوبكم، وأهم شي الترتيب والخط الحلو، ترى العين تاكل قبل اللسان والدرجة تتأثر بالترتيب. :
اذا تريد تعرف عن الانشاء اكثر دوس هنا
الأدب (حفظ أول بأول):
الأدب مو صعب بس لا تخلونه يتراكم. جنت أحفظه يوم بيومه وبكل الصيغ الوزارية الممكنة. والقصائد؟ لا تعقدوها، اكو باليوتيوب مسويها على شكل أغاني تساعدكم بالحفظ. أنا عن نفسي جنت أحفظها بصوتي وبإلقاء شعري (لأن صوتي حلو ما شاء الله 🌚😂)، حتى المدرسات جانوا يحبوني بسبب هالسالفة 🦋.
القواعد (الأساس هو السند):
نجي للجزء الأهم والأصعب. القواعد يحتاج أساس قوي؛ لازم تعرفون أنواع الجمل، والأفعال (لازم، متعدي، مبني للمجهول)، وحروف الجر، وعلامات الإعراب. إذا أساسكم ضعيف مستحيل تضبطون المادة، فأنصحكم تشوفون فيديوهات الأساسيات باليوتيوب قبل كل شي.
المخططات والجداول:
المواضيع اللي بيها فروع وتشعبات هواي (مثل أنواع "ما" أو أنواع "لا")، أحسن طريقة لضبطها هي الجداول والمخططات. هيج المعلومة تطبع بدماغكم وما تخربطون بيناتهم.
الوزاريات (سر النجاح):
الوزاريات خط أحمر! ورا ما تخلصون أي موضوع، گبل روحوا حلوا أسئلته الوزارية. هاي الطريقة تخليكم تتعودون على نمط الأسئلة وتصير عندكم ثقة بالمادة.
نصيحة أخيرة: بالأدب والقواعد، تگدرون تعتمدون وبشكل كامل على شرح "حسين عبيدة"، بطل وميقصر.
وهسه خلينا ننتقل لتجربة طالب اخر حول افضل مدرس عربي سادس علمي في العراق
تجربة ثاني طالب وشلون جاب 99 بالعربي!
يا هلا بيكم طلابنا.. اليوم راح أسولف الكم قصتي ويه العربي بالسادس، وشلون كدرت أطلع 99 (والمفروض 100 بس غلط بسيط طيّر الدرجة). خلوا بالكم يمي لأن هاي التجربة راح تفيدكم كلش:
1. الأساتذة والمصادر اللي اعتمدتها:
القواعد: قريت على الأستاذ العملاق حمزة الجابري باليوتيوب. جبت ملزمته بس ما اكتفيت بيها، جنت أسوي "مخططات" خاصة بية ويه كل محاضرة، وأكتب مثال بسيط جوه كل ملاحظة حتى تطبع بدماغي.
الأدب: قريت على الأستاذ عقيل الزبيدي. جان نظامي وياه حديدي: "أقرا الصبح، أمتحن بالليل"، وما تراكم عندي أي شي.
2. طريقة الدراسة والتحضير:
الوزاريات هي المفتاح: بعد ما أخلص كل محاضرة ويه الأستاذ حمزة، أروح أحل كل الأسئلة الوزارية الخاصة بالموضوع. حتى جنت أروح لأساتذة بالمنطقة (باليمنة) بس حتى أخذ أسئلة وأمتحن نفسي.
التراكم ممنوع: الأدب إذا عفتوه يتراكم راح تكرهون المادة وتصير جبل عليكم، فلازم ينقري يوم بيومه.
ربط المواضيع: القواعد سلسلة مرتبطة؛ الاستفهام يوصلك للنفي، والنفي يوصلك للتقديم والتوكيد. من تفهم الأساس وتضبط الجملة الاسمية والفعلية، الباقي كله يصير سهل.
3. الانشاء والدرجات:
تعبير ذاتي: الانشاء ما اعتمدت على شي جاهز، أنا من زمان عندي قابلية تعبير، فجنت أعتمد على أسلوبي الخاص وكتبت بيدي بالامتحان.
نصف السنة مو مقياس: لا تحبطون إذا درجاتكم بالشهرية أو بنصف السنة مو زينة. أنا بنصف السنة جنت آخذ بالـ 60! بس بالوزاري جبت 99. الوزاري ينطي حقك وما يظلم أحد إذا دارس صح.
4. نصيحة للي يريد الـ 100:
لا تترك أي شي: بالامتحان الوزاري ضافولنا 3 مواضيع جديدة، قريتهن قبل الامتحان بيومين بس (على أساس أتركهن)، وبالأخير إجن منهن بالأسئلة! اللي يريد الـ 100 لازم يقرأ الكتاب من الجلد للجلد.
الامتحانات: كثرة الامتحانات هي اللي تخليك "واحد على واحد" بالعربي. لا تخاف من الغلط، أغلط هسه حتى ما تغلط بالوزاري.
تجربة ويه ثالث طالبة وشلون جابت 98 بالعربي
قصتي من "عقدة العربي" للـ 98 بالوزاري! 🎓✨
العربي وما أدراك ما العربي.. هاي المادة جانت "عقدة حياتي" بالثانوية، ومثل ما تدرون درجتي جانت يا دوب (84) وبالكوة طلعت بيها. دخلت للسادس وجان لازم أواجه هذا الخوف، فقررت أسجل وي الأستاذ عقيل الزبيدي.
البداية الصعبة (لحظة الانهيار):
صراحة، ما جان عندي أي توقعات وردية، لأن تاريخي ويه العربي "مريض" ومأساوي. أول شهر بالتسجيل الإلكتروني ردت أبطل! حسيت روحي كلشي ما جاي أفهم وضاعت الحسبة عليّ. وقتها أهلي انطوني "رزالة لطيفة" كالوا لي: «، شو نسوي؟ نجيب سيبويه من قبره حتى يشرحلج؟ انطي فرصة لنفسج وللأستاذ!».
نقطة التحول (العربي صار زلاطة!):
بعد هاي النصيحة، قررت أذب مخاوفي على صفحة وأبدي بداية جديدة. قمت أطبق كل كلمة يقولها الأستاذ "بالحرف الواحد". وما أحجيلكم على الصدمة.. العربي فجأة صار عندي زلاطة! تحولت حياتي لنعيم، وصارت المادة اللي جنت أكرهها هي أكثر مادة أحبها وأستمتع بدراستها.
يوم الامتحان الحاسم:
بليلة الوزاري، من شفت الأسئلة (السؤال الأول - فرع أ)، ابتسمت.. هذا المثال قاريته بدفتر الواجبات! وصلت لمرحلة مو بس أعرف الجواب، بل أعرف هذا المثال من يا ملزمة وبأي صفحة مكتوب. طلعت من الامتحان وأنا ضامنة الدرجة، والحمد لله جيتني 98.. جانت من أسعد لحظات حياتي.
كلمة بحق الأستاذ:
الأستاذ عقيل الزبيدي مو بس مدرس، هو عملاق بطريقته وتوصيله للمعلومة. ملازمه رهيبة، وأسلوبه يخليك تضبط المادة غصب، وخصوصاً فقرة "الأسئلة الإثرائية" (الإنذار) اللي يطلع بيها يفجعنا تفجيع بس هي اللي سوتنا أبطال.
تجربة رابع طالب ويه افضل مدرس عربي سادس اعدادي
إذا قررت تقرأ عربي على اليوتيوب، راح تدوخ لأن المدرسين هواي. حتى ما تضيع وقتك، اتبع هاي الخطة:
1. شلون تختار مدرس القواعد؟
لا تحير، جرب هالطريقة: شوف أول 3 محاضرات لأي مدرس، إذا فهمت عليه استمر. بس قبل كل شيء، لازم تضبط الأساسيات لأن هي مفتاح القواعد.
الأستاذ عقيل الزبيدي: قمة بالروعة، ابدأ بأساسياته وإذا فهمت عليه كمل المنهج على شرحه وملزمته.
الأستاذ سجاد اللامي: إذا ما رهمت ويه عقيل، سجاد اللامي أساسياته وشرحه باليوتيوب كلش ممتاز.
الأستاذ حمزة الجابري: يعتبر من التوب بالقواعد وشرحه يجنن.
الأستاذ هشام المعموري: شرح راقي ومرتب.
نصيحة: المدرس اللي تثبت عليه، ضروري تجيب ملزمته حصراً.
2. الملاحظات الذهبية والوزاريات:
ملزمة الألفية (عقيل الزبيدي): هاي خط أحمر، كلش ضرورية ومهمة للقواعد.
حل الوزاريات: من تخلص أي موضوع، لازم تحل أسئلته الوزارية حتى تثبت المعلومة وتعرف النمط شلون يجي.
بخصوص الأستاذ حسين الغريب: نصيحة، لا تعتمد عليه بشرح المواضيع الأساسية (مثل الاستفهام والنفي) لأن محاضراته قليلة ومختصرة زيادة، بس قوائم التشغيل مالته للـ "ألفية" والمراجعات الوزارية (مثل مراجعة 2019 و2020) كنز! بيها ملاحظات وأمثلة وزارية مو طبيعية، حضر ورقة وقلم وشوفها حتى تضمن الدرجة الكاملة.
3. شلون تضبط الأدب؟
الأدب تكدر تقراه على الكتاب وتأشر الوزاريات، أو تجيب ملزمة جاهزة.
ملزمة "الواضح والمضمون": من الملازم الممتازة والمؤشرة وزاري.
ملزمة عقيل الزبيدي: هم كلش زينة ومرتبة.
الشرح: إذا تشوف محاضرات يوتيوب للأدب (مثل محاضرات سجاد اللامي الجديدة) راح تثبت المعلومة أكثر ومبتنساها، وهذا يعتبر "زايد خير".
حفظ القصائد: اكو قنوات باليوتيوب تسوي القصائد على شكل "أغنية" بموسيقى، اسمعها أكثر من مرة وراح تحفظها غصب وبسهولة.
4. الإنشاء (درجة مضمونة):
شوف فيديو الأستاذ حمزة الجابري عن الإنشاء، ينطيك فكرة وشغلات توضحلك هواي أمور بمحاضرة قصيرة.
أكو ملزمة (PDF) للأستاذ عقيل الزبيدي اسمها "أسرار كتابة الإنشاء"، بيها مقدمات وخواتم وملاحظات كلش تفيدك وتخليك تعرف شلون ترتب دفترك.
تجربة خامس طالب | شلون تقرأ العربي؟؟؟
مرحبا أصدقائي، إن شاء الله الكل بخير.. اليوم حبيت أشارككم طريقتي بدراسة قواعد العربي
1. المنهج الجديد (صدمة الـ 10 مواضيع):
مثل ما تعرفون، القواعد جانت 7 مواضيع بس، بس هسه انضافت 3 مواضيع جديدة (التمني والترجي، العرض والتحضيض، الإغراء والتحذير) وصارت 10. صراحة أشوف هالقرار مو بمكانه، لأن المنهج صار ضخم حاله حال الفيزياء والكيمياء، وما خلو فرق بين العلمي والأدبي.
2. شلون اختاريت المدرس (أصعب قرار):
بقيت فترة طويلة محتار أدرس على منو واشتري ملزمة منو، بس بالأخير وبعد تفكير طويل، استقريت على هذا الثنائي الذهبي:
الشرح: الأستاذ حسين عبيدة باليوتيوب (لأن أسلوبه كلش يبسط المادة).
الملزمة: ملزمة "أستاذنا" للأستاذ عقيل الزبيدي.
3. عُقدة الأساسيات (الحل النهائي):
أكبر مشكلة تواجهنا بالعربي هي ضعف الأساسيات، وخصوصاً جيلنا اللي تضرر بفترة كورونا والعطل. جنت أسمع "خبر مقدم وجوبا" أو "مبتدا مؤخر" وكلشي ما أفهم!
الحل: لا تستهينون بالأساسيات أبداً.. هي مفتاح المادة. أنا قريت الأساسيات على الأستاذ حسين عبيدة، ولكيتها موجودة بالتفصيل بأول صفحات ملزمة "أستاذنا".
هاي الملزمة حرفياً "كافية ووافية"، وكل الأمثلة اللي يشرحوها العمالقة (مثل ست رافيل، خضر الظاهر، أحمد النعيمي) راح تلكوها موجودة بيها ويه كل ملاحظة.
4. ملاحظة بخصوص الترتيب:
ممكن تلاحظون الأستاذ حسين عبيدة يقدم موضوع أو يأخر موضوع بشرحه، بس لا تقلقون، كل شي موجود بالملزمة ومرتب بطريقة تخليك تسيطر على المادة غصب.